اللهم إني صائم
مع الإعتذار والتحية لأستاذتنا الكاتبة حلا طه
أبو فراس وأبو محمد ما غيرهم قعدوا قعدة ثانية
- أه يا أبو فراس شو شايفك اليوم مكشر ومش عاجبك حدا ؟؟
- والله يا أبو محمد .......... هالمسلسلات اللي بطلعونا فيها برمضان كلها حكي فاضي .
- ولو يا أبو فراس والله إنها حلوة كثير وبتابعها كلها وخاصة اللي بتيجي بعد التراويح .
- لأ يا عمي أنا بحكي عن المضمون مش عن التمثيل
- شو صاير محلل ولا ناقد ... وما معنا خبر
- لأ بس الللي حاصل أنه كل سنه نفس المواضيع
- كيف فسرلي لو سمحت ..... ونورني بعد إذنك ...الله يفتح عليك
-والله يا أخي كل المسلسلات قصتها واحده وكل رمضان نفس القصة ولكن بممثلين مختلفين ومخرجين أخرين
- يا عيني والله النقاد ما هم زيك ............ وبعدين
- يعني كل مسلسل فيه فقير وفيه غني والغني بيستقوي على الفقير وبياخذ حقه
- أه وبعدين
- كل مسلسل في حمل غير شرعي وفي إجهاض وفي طلاب جامعه فاشلين
- يا لطيف
- كل مسلسل فيه حقد وفيه زواج غير شرعي وفي مخدرات وحشيش
- موضه يا عمي
- في شركة بتخسر وبقدرة قادر في مين ينشلها من الخسارة
- في ضحك على الشباب وتصوير حياتهم بأنها مسخرة وسهله وكلها سهر ورحلات وسارات ولبس غير شكل ومياعه ومياصه وسفر ومصاريف على الفاضي والمليان ولا في سلطة لا لأب ولا لأم .
- هيك الناس بدها يا أخي ... والناس مبسوطه وأنت مالك ومالهم ..ما في حد مشتكي وكلهم بتابعوا هيك مسلسلات .....وبإهتمام ...حتى أنه ما بتقدر تحكي لأهل بيتك يعملولك قهوة إلا وقت الدعاية
- أه نيالك يا خوي
- وشو كمان في عندك أحكي
والله طقيت من هالقصص والحكايات
- طيب شو بدك ؟؟
- يا أخي ليش ما بحطوا إشي يحث على إحترام الكبير ( الوالد والوالده والعم والعمه والجد والجده ) مش المسخرة وقله ... وين عاداتنا وتقاليدنا ودينا .
-وما في فهاي المسلسلات أي حافز أو حث للشباب على عمل الخير ولا الإيمان وإحنا يا سيدي بشهر رمضان
-والله كلامك حلو وذكرتني بشغلة إمبارح قرأتها بالقرأن
- شو قرأت يا شيخي
-قرأت سورة المؤمنون ...وصفات المؤمنون بها
- الله يبارك فيك .. إقرأها لي وإشرحلي لو سمحت
- بسم الله الرحمن الرحيم ( قد أفلح المؤمنون * الذين هم في صلاتهم خاشعون * والذين هم عن اللغو معرضون * والذين هم للزكاة فاعلون * والذين هم لفروجهم حافظون * إلا على أزواجهم أو ما ملكت أيمانهم فإنهم غير ملومين * فمن إبتغى وراء ذلك فأولئك هم العادون * والذين هم لأماناتهم وعهدهم راعون * والذين هم على صلواتهم يحافظون * أولئك هم الوارثون * الذين يرثون الفردوس هم فيها خالدون * ) صدق الله العظيم
- جزاك الله خيرا
- ولكن يا أخي كل اللي بحطوا بالمسلسلات غير هيك وعكسوا .... يعني بحببوا الفساد للشباب
- اللهم ألطف بنا
- يا الله يا أخي قرب موعد الإفطار
- في أمان الله
- ولكن لسه في حكي كثير لازم نحكي فيه
- خليها لبكرة .... ممكن واحد ثاني من جيران بحل المشكله
اللهم إني صائم
كل رمضان وأنتم بخير
والسنة الجاي ومسلسلاته أحسن من هيك
14 اكتوبر, 2006 12:45 م